Inez, Janet en Agnes Krynauw

 Ek het 2 van hierdie 3 susters van my skoonpa (David Willem 1908) geken. Ons het veral noue kontak met tannie Inez in die Paarl gehad. Sy was ‘n onderwyseres

Tannie Janet was skoolhoof op Oudtshoorn.  Na tannie Inez se afsterwe in 1996, was daar talle interessante geskrifte tussen haar dokumente: toneelstukke, briewe en selfs n operette wat sy geskryf het. Hierdie geslag het vir mekaar briefies en notas gestuur- dikwels rympies. Hier is enkele voorbeelde.

Inez Krynauw, (geb. 1901) 

Sy het die volgende op ouderdom 90 in die ouetehuis geskryf:

Ouderdom

Toe ek jonk was, kon ek agterop skop
My voete buig tot oor my kop
Algaande het ek stram geword
Maar oujaarsnag nog steeds te kort
Noudat ek oud is en my ore raas
Kan ek nie straat af of ek blaas
Staan soggens op, en vat my koerant
Lees die sterfgevalle van hoek tot kant
Ontbreek my naam, weet ek ek leef
En kan my dan weer na bed begeef.

Die Sleutelstorie

Wie het my sleutels weggeneem?
Ek het hul hier – net hier neergesit. Nou is hul skoonveld-heen.
Nee man, hul lê nie op die grond
Ek het gesoek hier oral rond.
My sak! My geheue is nie so swak!
Kyk self! Genade tog. Hul is nie in my sak.
Ag Annatjie kom sluit tog oop die deur.
Ek het my sleutels iewerswaar verloor.
Met my het dit nog nooit gebeur –
Behalwe soms, kom dit vir my nooit oor.
Hul was tog veilig in my sak
Nou het ek alles uitgepak
Dis nêrens te bespeur.
Kan jy nou meer! Hul hang nog in my deur.
Wie sluit die deure dan so vroeg!
Ons is terug oor vroeg genoeg!
Dat ek my sleutel tuis kon laat.
Nou maar die siekeboeg, dis al raad.
Maar hieroor gaan ek darem praat!
Maar wag – nou moet die hoogste woord maar uit.
Ek het vergeet die deure word om agtuur reeds gesluit.